மெளனப் புதையாய்வு

மெளனப் புதையாய்வு

மெளனங்களைத் தோண்டுவதற்கு முன்

போஸ்ட் மார்டம் செய்வோம் என்ற

உத்தரவாதம் கொடுங்கள்

புதைத்ததை தோண்டியெடுத்து

தீயினுக்குத் தின்னக் கொடுப்பதற்கு

கிருமிகள் தின்னட்டும்

கயமைத்தனத்திற்கு எதிரான கோபங்களும்

போராட முடியாமைக்கான ஆற்றாமைகளும்

இழிவைச் சகித்துக் கொண்ட இயலாமைகளும்

புதையுண்டு கிடக்கின்றன

ஆய்வின் முடிவில் ஓர் இனவொழிப்பு

கண்டறியப்பட்டால்

மெளனம் கைதட்டி ஆர்ப்பரிக்கும்

மறைக்கப்பட்டால்

ஓலமிட்டு அழும்

மெளனத்திற்குப் பின் மீண்டும்

மெளனமாவீர்கள் என்றால்

தயவுசெய்து தோண்ட வேண்டாம்

மெளனமாக இருப்பதற்கு

அனுமதி கொடுத்த உங்களுக்கு நன்றி

*****