சித்திரகுப்தனின் மிகை மதிப்பு

சித்திரகுப்தனின் மிகை மதிப்பு

நீண்ட பயணத்தில் துணை வரும் செருப்பு

அறுந்த போகும் போது

கழற்றி வீசத்தான் வேண்டும்

அறுந்தது ஒரு செருப்பு

மற்றொரு செருப்புக்கும் வீசுதலே விதி

புதிய செருப்பு காலில் பொருந்தி

தேய்ந்து அழியும்

நகரின் முக்கிய வளாகத்தில்

மின்னொளிகள் ஜொலிக்க வீற்றிருக்கும்

செருப்புகள் மெரினா கூட்டத்தின்

ஜோடிகள் போல

பிரிந்த பின் எந்தப் பயனும் இல

அறுந்த செருப்பைத் தைத்துத் தரும்

ஒரு தொழிலாளியைப் பார்க்கையில்

சித்திரகுப்தன் தன் ஏட்டில்

நீட்டித்து எழுதி அனுமதித்துக் கொள்கிறான்

அதன் ஆயுட்காலத்தைச் சற்றுக் கூடுதலாய்

*****