மீண்டும் மீண்டும் சிரிக்கின்ற மக்கள்!

மீண்டும் மீண்டும் சிரிக்கின்ற மக்கள்!

பேரங்கள் புகைமூட்டம் போல் எழுந்து

அஸ்திவாரத்தை அசைக்கின்றன

வாக்குறுதிகள் எழுதப்பட்ட சுவடற்று

நீரில் மிதந்து செல்கின்றன

ஒன்று இரண்டாகி, இரண்டு மூன்றாகி,

மூன்று நான்காகி, நான்கு ஐந்தாகி... ஆகி.... ஆகி...

சொற்களை வீசி எறிந்து

சண்டையிட்டுக் கொள்கின்றனர்

ஆத்மாக்களின் அமைதி மண்டபத்தில் அமர்ந்து

கவிழ்ப்பு வேலைகள் குறித்து

நிதானமாக தியானிக்கின்றனர்

ஒரு எழுதப்பட்ட புனை கதையை எடுத்து

காலக்கலைஞன் தன் இஷ்டப்படி

படம் பிடித்துத் தள்ளுகிறான்

தீப்பற்றி எரியும் செய்திச் சேனல்களை

மக்கள் சிரித்துச் சிரித்துப்

பார்த்துக் கொண்டிருக்கிறார்கள்

தங்கள் பிழைப்பில் மண் விழுந்து விட்டதாக

நகைச்சுவை நடிகர்கள்

வயிற்றில் அடித்துக் கொண்டு அழுகின்றனர்

மறுபடியும் ஒரு பிரேக்கிங் நியூஸ்

மக்கள் விழுந்து விழுந்து சிரிக்கின்றனர்

*****