அட்டையை முடிந்து வை

அட்டையை முடிந்து வை

வேண்டுதலுக்காக முடிந்த காசு

மஞ்சள் துணியில் இருக்கிறது

உண்டியலில் போடச் சொல்கிறாள் அம்மா

உண்டியலிலிருந்து எடுப்பவர்

எந்த நோயைத் தீர்த்த நாணயம்

அது என்று யோசித்துப் பார்ப்பாரா?

அந்த நாணயம் கை மாறி கை மாறி

நோய் தீர்த்த நாணயம் என்று

அறியப்படாமல் போய்க் கொண்டே இருக்குமா?

வீட்டில் ஒருவர் நோயில் படுக்கும் போது

ஒரு நாணயம் முடியப்பட்டு விடும்

பழைய அம்மாக்கள்  இருக்கும் வரை

நோய் தீர்த்த நாணயங்கள்

காப்பீடு எனும் வடிவமெடுத்து

அட்டைகளாக உருமாறி விட்டன.

அட்டைகளில் ரகசிய எண்களும்

ரகசிய ஒப்பந்தங்களும்

முடிந்து வைக்கப்பட்டு இருக்கின்றன,

எல்லா வகையான நோய்களுக்குமான

மஞ்சள் துணியில் முடிந்து வைக்கும்

நாணயம் போன்றதல்ல என்பதைப்

மெளனமாய்ப் பிரகடனப்படுத்துவது போல

*****