அசைக்க முடியாத வீடு

அசைக்க முடியாத வீடு

நானிருக்கும் வீட்டை விட்டு

யாரும் என்னை விரட்ட முடியாது

வாடகைக் கேட்டு மிரட்ட முடியாது

உள்ளிருக்கும் பொருட்களை அள்ளி

வெளியே வீச முடியாது

கிரயப் பத்திரம் மாற்றி

வேறொருவர் பெயரில் பதிவு செய்ய முடியாது

நெடுஞ்சாலை விரிவாக்கத்திற்கென

இடிக்க முடியாது

ஆக்கிரமிப்பில் இருக்கிறதென

நோட்டீஸ் கொடுக்க முடியாது

ஒரு ஊரே அழிந்த

பாழடைந்த வீட்டில் இருக்கிறேன்

உங்கள் சட்ட திட்டங்கள்

இங்கு செல்லாது

மற்றொரு ஊரை அழிக்கும்

துரப்பனத் திட்டத்தோடு

உங்கள் தஸ்தாவேஜூக்களைத்

தூக்கிக் கொண்டு செல்லுங்கள்

*****