வெயிலைத் திட்ட ஆரம்பித்தோம்

வெயிலைத் திட்ட ஆரம்பித்தோம்

அடித்துத் துவைத்துக்

காய போட்ட பிறகும்

சிறுபிள்ளை போல் பேசினாய்

மழலைகளை அடிக்க

எப்படி மனம் வருகிறது என்று

யாரும் கேட்க முடியவில்லை

குடித்து விட்டு தள்ளாடி தள்ளாடி

முன் திண்ணையில் சுருண்டு கிடக்கும்

உன் கணவனுக்கு எடுத்துச் சொல்லும் பக்குவம்

எங்களுக்கு இல்லை என்று

நாங்கள் அங்கலாய்த்துக் கொண்டோம்

விடியாத இரவு விடிந்து

காலையில் எழுந்தவனை

சிறுபிள்ளையாக்கி பணிவிடைகள்

செய்வதைப் பார்த்து

நேற்றிரவு நீ சிறுபிள்ளையாய் அழுத

அடர்ந்த கருமையை நீக்க முடியாத

வெயிலைத் திட்ட ஆரம்பித்தோம்

*****