காலத் தீக்குச்சி

காலத் தீக்குச்சி

கெஞ்சிய கைகளை முடிச்சிட்ட பிறகு

மண்டியிட்ட கால்களை திருகி விட்ட பிறகு

பணிவோடு வணங்கிய

முதுகெலும்பை உருவிப் போட்ட பிறகு

உணவென சதைகளை படையலிட்டும்

சதைகளை பிய்த்தெறிந்த பிறகு

நிறம் பிடிக்கவில்லையென

தோலை உரித்து எடுத்து பிறகு

நல்ல விலை போகும் என்று

உறுப்புகள் ஒவ்வொன்றையும்

கண்டம் துண்டமாக வெட்டிய பிறகு

உடலில் ஒட்டியிருந்த உயிருக்கு

பிச்சைக் காசைத் தூக்கியெறிந்த பிறகு

இனி எதுவும் பொறுப்பதில்லையென

இப்படித்தான் எழுதப்படுகின்றன

யுகத்தைச் சுட்டெரிக்கும் புரட்சிக் கவிதைகள்

சூரியனை உரசி விட்ட

காலத் தீக்குச்சியைப் போல.

*****