சாகாத நட்டுவாக்காலிகள்

சாகாத நட்டுவாக்காலிகள்

ஒரு முறை வந்து

கடித்து விட்டு

நசுங்கிக் செத்த

நட்டுவாக்காலி

தினம் தினம் வந்து

கடிப்பதாகப் புலம்பிக் கொண்டிருக்கிறாள்

புகுந்தகத்துக்கு வந்த புதுப்பெண்.

அவள் ஞாபகக் கூட்டில் வாழும்

நட்டுவாக்காலியைத்

தினம் தினம் ஞாபகப்படுத்துவது போல்

கொட்டிக் கொண்டிருக்கிறார்கள்

அவளுக்கு வாய்த்த

அத்தையும் மாமாவும்.

நட்டுவாக்காலிகள் சாகாது என்று

நம்பும் அவளை

நட்டுவாக்காலியை விட

பயங்கரமாகப் பயமுறுத்தி எழுகின்றன

விஷம் முற்றியக் கனவுகள்.

*****