சொல் வாகனங்கள்

சொல் வாகனங்கள்

சொற்கள் வாகனங்களைப் போல

எண்பது கிலோ மீட்டர் வேகத்தில்

வந்து கொண்டு இருக்கும்

சில‍ நேரம் டிராபிக்கில் மாட்டிக் கொள்ளும்

பள்ளம் மேடான வாழ்க்கைச் சாலையில்

பக்குவமாய்ப் பயணிக்கும்

விபத்தென்று வந்து விட்டால்

அர்த்தங்கள் அடிபடும்

ஐ.சி.யு.வில் கிடக்கும் ஆன்மா

மெளனத்தின் மேன்மையாய்ப்

புலம்பிக் கிடக்கும் சொற்கள்

ஆறுதலுக்கு அருகில் நின்று

கேட்டுக் கொண்டிருக்கும் தனிமை

கட்டிலுக்கு அடியில்

குஷியாக ஓடித் திரியும்

கரப்பான் பூச்சிகள்

மூட்டைப் பூச்சிகளை நசுக்கத் தோன்றாமல்

தத்துவம் பேசிக் கொண்டிருக்கும்

சொற்களைப் பிடித்து

நான்கு அறை விட்டால் தேவலாம் போலிருக்கும்

கட்டப்பட்டிருக்கும் கைகள்

பாவச் சொற்கள் முன்

மண்டியிட்டுக் கொண்டிருக்கும்.

*****