நதியின் பாவம்

நதியின் பாவம்

நதியாய்ப் பிறப்பதொரு பாவம்

அதன் திசையைத் தீர்மானிக்கிறார்கள்

மணலைப் பிடுங்கிக் கொள்கிறார்கள்

கூழாங்கற்களை அள்ளிக் கொள்கிறார்கள்

வீட்டுக்கொரு மகனை

போர்க்களத்துக்கு அனுப்புவது போல

வீட்டுக்கொரு சாக்கடைக் கால்வாயை

கலந்து விடுகிறார்கள்

கருப்பாய் நிறம் மாறி

சாக்கடையாய் ஓடும் நதியைத்

தூய்மைபடுத்துகிறோம் என நிதி ஒதுக்கி

கருப்புப் பணத்தை உருவாக்குகிறார்கள்

இடைமறிக்கும் ஆக்கிரமிப்புகளை

எதுவும் சொல்ல முடியாமல்

ஓடிக் கொண்டிருக்கிறது நதி

பாலங்கள் மீது ஓடும் வாகனங்களை

பாலத்திற்குக் கீழ் ஓட்டமில்லாத நதி

ஏக்கப் பெருமூச்சை துர்நாற்றமாய்

வீசிய படி வேடிக்கைப் பார்க்கிறது

வெள்ளமெனப் பெருக்கெடுக்கும் காலத்தில்

கரையுடைத்து கோபம் காட்டலாம் என்ற

நம்பிக்கையோடு பொறுமையாக

நகர்ந்து கொண்டிருக்கிறது

கசடுகள் பெருத்த அசட்டு நதி

இந்த பாவ நதியில்

ஒரு காலத்தில் செய்த பாவங்கள் தீர

மக்கள் நீராடினர் என்பது வரலாறு.

*****