திணை மயக்கம்

திணை மயக்கம்

ஆற்றுக்கு அந்தப் புறம்

அக்கரையில்

நெருஞ்சி முற்கள் இடற

எடுத்து விட்டு எடுத்து விட்டு

நடந்த நாட்கள்

ஞாபகங்களைக நறுக்கென்று குத்துகிறது

இப்போது

வற்றிக் கிடக்கும் ஆற்றுக் கரையோரம்

கருகிக் கிடக்கும் முட்செடிகளைப்

பழித்துக் கொண்டு

காலணி இல்லாமல் நடக்கும் பாதங்களை

கரையெங்கும் குவார்ட்டர் பாட்டில் உடைசல்கள்

பதம் பார்க்கிறது.

முன்னொரு காலம்

கரும்புக் காடாய்

வாய்க்கால் வரப்பு மதுவாங் கட்டை

நரிகள் ஊளையிட்ட இடமெல்லாம்

போதை  உளறல்கள் நிரம்பிப் பெருக்கெடுத்து

பொங்கிப் பிரவாகமாகி

வாய்க்கால் வழி வழிந்து கொண்டிருக்க

வரப்புகள் மேல் எங்கும்

வாட்டர் பாக்கெட் உறைகள் முளைத்திருக்க

மதுவாங்க் கட்டைகள் எங்கும்

சிதறிக் கிடக்கும் சைடீஸ்களைக்

கொத்திக் கொண்டு போகின்றன

கருப்பழிந்து உடல் வெளுத்து

வற்றிப் போனக் காக்கைகள்

*****