இடைச்சொல்

இடைச்சொல்

இட்லி சுடும் ஆயாவுக்கு

இரண்டாயிரம் கிடைத்தது

துப்புரவு தொழிலாளி

ஐநூறு ரூபாய் நோட்டை

முதன் முதலாய்ப் பார்த்தார்

திருநங்கை என்று பாரபட்சம் பாராது

இரண்டு ஐநூறு நோட்டுகள்

அவருக்கும் வழங்கப்பட்டது

ஒரு வேட்பாளர் இரண்டாயிரம்

கொடுப்பதைக் கேள்வி பட்ட

மற்றொரு வேட்பாளர் ஐயாயிரம்

கொடுக்க முன்வந்தார்

இப்படிப்பட்ட இடைத்தேர்தலா

பணப்புழக்கத்தைக் காரணம் காட்டி

ரத்து செய்யப்பட்டது

என்று விவாதிக்கப்பட்டதற்கு

முதியோர் பென்சன் மூன்று மாதங்களாய்க்

கிடைக்கப்பெறாத முத்துச்சாமி பதில் சொன்னார்,

"நம்ம ஏரியாவுல கக்கூஸ் கட்டுறதுக்கும்,

தொகுப்பு வீடு கட்டுறதுக்கும்

ஒதுக்குன பணத்துலதாம்ல

ஆயிரமும் ஐநூறும் ரெண்டாயிரமும்னு

அவனவனும் கொடுக்குறான்!

அவன் காசுல கொடுக்கறதுக்கு

அவன் ஏன்லா தேர்தல்ல நிக்குறான்?"

*****