யானை முக பிரார்த்தனை

யானை முக பிரார்த்தனை

மின்வேலியில் அடிபடாத

யானையொன்று

கோயில் யானையாக வாழப் பழகியிருந்தது

யானைக் கூட்டத்தோடு சாகப் பிராப்தம்

இல்லாத அது

பாகன் கையால் தினம் அடிபட்டுக் கொண்டிருந்தது

தன் இணையைப் பிரிந்த ஏக்கத்தை

தம்பதிகளாய் வருவரை

துதிக்கை வைத்து ஆசிர்வதிப்பதன் மூலம்

தீர்த்துக் கொண்டது

தன் குட்டியைக் கொஞ்சும் ஆசையையெல்லாம்

சிறுகுழந்தைகளுக்கு காட்டும் வேடிக்கை மூலம்

போக்கிக் கொண்டது

கோரிக்கைகளுக்கு செவி சாய்ப்பார் இறைவன்

என்று வரும் பக்தர்களைப் பார்த்துக் கொண்டு

கோயில் வாயிலில் நிற்கும் அது

இன்னும் எத்தனை காலம்

மோட்சம் பெறாத அடிமையென வாழும்

இந்த வாழ்க்கை என்று

இறைவனைத் தினம் தினம் பிரார்த்திக் கொண்டது.

*****