புதிய திருப்பம்

புதிய திருப்பம்

கட்டிக் கொண்ட பின்

குடிகாரன் என அறிந்து

டாஸ்மாக்கிற்கும் வீட்டிற்கும்

மீன் பாடி வண்டி போல்

அலைவது முதலில் புதிதாக

அதன் பின் புதிராக இருந்தது.

அவன் அடிகளைச் சுமப்பது

கருப்பையில் கட்டிகளைச் சுமப்பது போல

அவத்தையாக இருந்தது.

தினம் வாந்தியைக் கூட்டிக் கழுவுவது

குடலைப் புரட்டி எறியும்

குமட்டல் வதையாக இருந்தது.

மது நொடியோடு அவன் தொடுவதும்

முத்தமிடுவதும்

பூரான் நெளிவது போலவும்

வெறிநாய்க் கடிக்கு ஊசி போடுவது போலவும் இருந்தது.

அவனைச் சகிப்பதும் சமாளிப்பதும்

பைத்தியக்காரனின் கையிலிருக்கும்

கத்தியில் காய்கறி நறுக்குவது போல

கஷ்ட சிரமமாக இருந்தது.

இவைகளெல்லாம் இருந்தது

இருந்தது இருந்தது இருந்தது

அவனைப் போல

ஒரு குடிகாரியாக ஆகும் வரை.

*****