ஊற்றப்படாத தேநீர்

ஊற்றப்படாத தேநீர்

ஒரு கோப்பைத் தேநீர்

காலியான போது

வாழ்க்கை முழுவதையும்

இறக்கி வைத்தேன்.

"இன்னொரு கோப்பைத்

தேநீர் வேண்டுமா?"

என்று கேட்ட போது

இறக்கி வைக்க

இன்னொரு வாழ்க்கை  இல்லை என்று

காலிக் கோப்பையே போதுமென்று

எடுத்துக் கொண்டு புறப்பட்டேன்.

நீ உன் தேநீரை

ஊற்ற முடியாமல்

தவித்து நின்றாய்.

நான் அங்கிருந்து

ஓட ஆரம்பித்தேன்.

நீ துரத்தும் எண்ணமிழந்து

நின்றிருக்கையில்

உன் தேநீர் நிரம்பி வழியத் துவங்கியது.

*****