புரட்சி மீன்கள் சுவைக்கப்படட்டும்

புரட்சி மீன்கள் சுவைக்கப்படட்டும்

இந்த மீன் நல்ல நதியில் நீந்தியது

சாக்கடை நதியில் நீந்தும்

அவலம் வந்தும் நீந்திக் கொண்டிருக்கிறது

அதன் முன்னோர்கள்

மிக மிக நன்னீர் நதியில் நீந்தியவர்கள்

அதன் பிள்ளைகள், பேரக் குட்டிகள்

இதனினும் மோசமான

நாற்ற நதியில் நீந்துவார்கள்

முட்டையிடும், குஞ்சு பொரிப்பதும்

அதன் வேலை என்று

இப்போது கண்டித்து விடுதல் நல்லது

நாளை நதியைச் சுத்தப்படுத்த வேண்டும் என்று

அது கொடி பிடித்தால்

துயரங்கள் வந்து சேரும்

அதனினும் அதைப் பிடித்து

அறுத்துத் தின்று செரித்து விடுவது

மிகவும் நல்லது

மற்ற மீன்களுக்கு

அது ஒரு பாடமாக இருக்கும்

புரட்சி என்பது பரவாமல் இருக்கும்

*****