இவர்தான் அவர்

இவர்தான் அவர்

இவர்தான் ஆற்றில் முதன் முதலில்

மணல் அள்ள ஆரம்பித்தார்

கல்வி வளர்ச்சியே நாட்டின் வளர்ச்சி என

ஊரில் முதன் முதலில்

தனியார் பள்ளியை ஆரம்பித்தார்

நம்ம சாதிக்கார பயலையும்

நாலு பேர் மதிக்கணும்ல என்று

சாதிச் சங்கமும் ஆரம்பித்தார்

எதுவா இருந்தாலும் காசு வேணும் என்று

நான்கு ஊர் தள்ளி இருந்த பொரம்போக்கு நிலத்தில்

பீர் பாக்டரியும் ஆரம்பித்தார்

அதிகாரமும் கையில் இருந்தால்தான்

அண்டியிருக்கிறவனுக்கு நல்லது பண்ண முடியும் என்று

சுற்று வட்டக் கிராமங்கள் பதினெட்டுக்கும்

கட்டப் பஞ்சாயத்தும் செய்ய ஆரம்பித்தார்

சமூக சேவை என்ற பெயரில்

டவுனுக்கு சற்று முன்னதாக

இன்ஜினியரிங் காலேஜ் ஆரம்பித்து கல்வித் தந்தையுமானார்

டவுனுக்குள் நடுமத்தி சென்டரில்

நர்சிங் காலேஜ் ஆரம்பித்து கல்வித் தாயுமானார்

கோயில் சிலை கடத்தி காசு பார்த்து

அதில் கொஞ்சம் கிள்ளி எடுத்து கோயில் கும்பாபிஷேகங்கள்

சில செய்து ஆன்மீகப் பேரொளியாய் ஒளி பரப்பினார்

விருதுகள் பல வாங்கி, பெயர்கள் பல தாங்கி,

ப்ளக்ஸ்கள் பல வைத்து

கடைசியில்

நானே உங்கள் வேட்பாளர் என்று

இப்போது ஓட்டுக் கேட்க வருகிறார்.

*****