தேவதூதராக அமைவதாக

தேவதூதராக அமைவதாக

ஒரே அபார்ட்மெண்டில்

சேர்ந்துவாழத் தொடங்கிய பிறகு

இருவருக்கும் தினம் தினம்

சண்டை எழத் தொடங்கியது

உருகி உருகி காதலித்தவர்களா நாம் என்று

அவர்கள் ஆச்சர்யப்பட்டுப் போனார்கள்

தனித்தனியாக இருப்பதே நல்லது என

ஆளுக்கொரு அபார்ட்மெண்டில் குடியேறிக் கொண்டார்கள்

அப்போதும்

அவன் அபார்ட்மெண்டுக்கு அவளும்

அவள் அபார்ட்மெண்டுக்கு அவனும் சென்று

அவ்வபோது சண்டை போடுவது தொடரவே

பரஸ்பரம் விவாகரத்து வாங்கிக் கொண்டார்கள்

பிறகு சில நாள்களில்

அபார்ட்மெண்ட் வாடகை கொடுப்பது சிரமமாக

இருப்பதாகத் தோன்றவே இருவரும்

ஒரே அபார்ட்மெண்டில் சேர்ந்து இருக்கலாம் எனத்

தீர்மானித்துக் கொண்டார்கள்

ஒரே அபார்ட்மெண்டில் இருப்பதன்

செளகரியத்தை உணரத் தொடங்கியதும்

தங்கள் சண்டைகளைத் தவிர்க்கும்

தேவதூதராக அமைவதாகட்டும் என

அவர்கள் முதல் வேலையாக

ஒரு குழந்தை பெற்றுக் கொண்டார்கள்

*****