இரு கை ஐஸ்கிரீம்

இரு கை ஐஸ்கிரீம்

மதிய உணவு எடுத்த வராத நாட்களில்

பகிர்ந்து கொண்ட உணவின் அன்பில்

செமஸ்டர் பீஸ் கட்ட முடியாத பொழுதில்

கை விரல் மோதிரம் தந்து

கண்ணீர் மல்க வைத்த கடப்பாட்டில்

சஸ்பெண்ட் செய்யப்பட்டிருந்த நாட்களில்

எடுத்து வந்து தந்த குறிப்புகளில்

பிறந்த நாளின் மூன்று நாள்களுக்கு முன்னதாக

யாருக்கும் தெரியாமல் எடுத்துத் தந்த

புத்தாடைப் பெருமிதத்தில்

தோழியே

இரு கைகளிலும் ஐஸ்கிரீம் கப்புகளோடு

பல்லால் பலூன் நூலைக்

கவ்விக் கொண்டு இருக்கும் குழந்தையைப் போல

உன்னிடம் எப்படிச் சொல்வது

என்று தெரியாமல் தவிக்கிறேன்

இந்தத் தோழமையை விட

காதல் பெரிதா சிறிதா என்று தெரியாமல்.

*****

முடிவு

நல்ல விலைக்கு

நெல்லை விற்க முடியாத விரக்தியில்

நல்ல விலைக்கு

விற்பதென முடிவு செய்தார் விவசாயி

நிலத்தை.

*****