சகஜ நிலை திரும்பியது

சகஜ நிலை திரும்பியது

நான்கு நாள்களாக நடுங்கிக் கொண்டிருந்த குமார், மனைவி மாற்றிக் கொண்டு வந்து கொடுத்து ரெண்டாயிரம் நோட்டை எடுத்துக் கொண்டு உற்சாகமாக நடந்து கொண்டிருந்தான் டாஸ்மாக்கை நோக்கி.

*****

விரக்தி

எந்த கோடீஸ்வரனும் விரலில் மை வைத்து ரூபாய் நோட்டு மாற்றவில்லை என்பதை அறிந்து கை விரலில்‍ வைத்திருந்த கரும்புள்ளியைப் பார்த்தபடியே விரக்தியோடு நடந்தான் மிடில் கிளாஸ் மாதவன்.

*****

அவசர அழைப்பு

முதியோர் இல்லத்திற்கு அனுப்பி வைத்த அப்பாவையும், அம்மாவையும் அழைத்து வந்தான் அகிலன் அவர்கள் அக்கெளண்டில் ஆளுக்கு ரெண்டரை லட்சம் போட!

*****

கருப்பு

கை விரலில் பேனாவின் கருப்பு மை பட்டதும் பதறிப் போனான், பேங்கிற்கு ரூபாய் நோட்டு மாற்றப் புறப்பட்டுக் கொண்டிருந்த கதிர்.

*****

ப்ளாஷ்பேக்

பணம் மாற்றியதற்காக கை விரலில் கருப்பு மை வைக்கப்பட்டதும், ஒரு கணம் யோசித்துப் பார்த்தார் நாகப்பன், எந்தத் தேர்தலிலும் வரிசையில் நின்று விரலில் மை வைத்து ஓட்டுப் போடாமல் இருந்த தன் கடந்த காலத்தை.

*****

வேற மிஷின்

ஆயிரம், ஐநூறு ரூபாய் நோட்டுகள் செல்லாது என அறிவிக்கப்பட்டவுடன், இனிமே வேற பிரிண்டிங் மெஷின்தான் வாங்க வேண்டும் என்று அலுத்துக் கொண்டான் கள்ளநோட்டு அடிக்கும் கரண்.

*****