கூகுளுக்கு மெமரி லாஸ் வருமா?

கூகுளுக்கு மெமரி லாஸ் வருமா?

விவசாயத்துக்காக

அம்மாவிடம் வாங்கிய பணத்தை

அப்பா எப்போதும் திருப்பித் தந்ததே இல்லை

திருப்பித் தரவும் விவசாயம் அனுமதித்தது இல்லை

ஸோ ஸ்வீட் விவசாயம்

*****

அலைபேசியைப் பிடுங்கினால்

கை ஒடிந்து விடுபவர்கள் இருக்கிறார்கள்

எலும்புகள் அவ்வளவு பலகீனம்

கால்சிய மாத்திரைகள்

காலாவதியாகி விடும்

*****

நீ தேடுவதை

உன்னுடன்   சேர்ந்து

கூகுளும் தேடுகிறது

நீ மறந்தாலும்

நீ தேடுவதை

கூகுள் மறக்காது

மெமரி லாஸ்

மனிதருக்குத்தான் வரும்

கூகுளுக்கு வராது

*****

தேய்க்க தேய்க்க

தேய்த்துக் கொண்டிருக்கிறது

கிரெடிட் கார்டு

செய்கூலி சேதாரம் தனி

*****

நீ அதை எவ்வளவு

நேசிக்கிறாயோ

அதுவும் உன்னை

அவ்வளவு நேசிக்கும்

உன் கடன்

டோன்ட் மிஸ் யூ

*****

ஐந்து நிமிட

டைட்டில் கார்டுகளைப் பார்க்க

தில் இருந்தால்

இரண்டரை மணி நேர

திரைப்படத்தைத் தாராளமாகப் பார்க்கலாம்

*****

அந்தப் பிரச்சனை எப்போதும்

அங்கேதான் இருக்கிறது

ஒரு மரணம்

ஓர் அழுகை

ஒரு வார்த்தை

ஏதேனும் ஒன்று

அதை மாற்றலாம்

அதுவரை அது

அங்கேதான் இருக்கும்

அதுவரை நாம்

அதை பேசிக் கொண்டிருக்கலாம்

*****