டாஸ்மாக்கைக் கும்பிடும் ஒருவர்

வேப்ப மரத்தடியைக் கடக்கும் போதெல்லாம்

தலையைத் தாழ்த்தி

ஒரு கையை மார்புக்கு நேராகக் கொண்டு வந்து

இரு சக்கர வாகனத்தில் பயணத்தபடியே

மனசுக்குள் கும்பிடு போட்டுக் கொள்வது

பல கால பழக்கம்

ஒரு புயல் மழையில்

 வேப்ப மரம் விழுந்து

அங்கே ஒரு டாஸ்மாக் எழுந்து

இப்போதும் கும்பிடு போடும் மனசும்

கவியும் தலையும்

நெஞ்சருகே செல்லும் கரமும்

அப்படியே இருக்கின்றன

டாஸ்மாக்கைக் கும்பிட்டுச் செல்பவரை

அதிசயமாகப் பார்க்கும்

அநேகம் பேர்

மனசுக்குள் திட்டித் தீர்த்துக் கொள்ளக் கூடும்

என்றாவது ஒரு நாள்

டாஸ்மாக் ஓரம் ஒருவேப்பங்கன்று

முளைக்காமலா போய் விடும்