தொலைக்காட்சியோ அலைபேசியோ பார்க்கக் கூடாதா என்ன?

தொலைக்காட்சியோ அலைபேசியோ பார்க்கக் கூடாதா என்ன?

பலரும் சொல்வது போல தொலைக்காட்சி பார்ப்பதோ, அடிக்கடி அலைபேசியைப் பார்த்துக் கொண்டிருப்பதோ தவறு என்று நான் சொல்ல வரவில்லை. அவற்றை நாம்தான் பயன்படுத்திக் கொண்டிருக்கிறோம் என்பதை உறுதி செய்ய வேண்டும் என்றுதான் சொல்கிறேன்.

நம் கையில் இருக்கும் ஒன்றை நாம் பயன்படுத்தாமல் வேறு யார் பயன்படுத்தப் போகிறார்கள் என்று நீங்கள் கேட்கலாம். நம் கையில் இருப்பதை நாம்தான் பயன்படுத்துகிறோம் என்பது உண்மைதான். நம் கையில் இருப்பது நம்மைப் பயன்படுத்தாது என்பதற்கு என்ன உத்திரவாதம் இருக்கிறது?

வீட்டில் இருக்கும் தொலைக்காட்சியும், கையில் இருக்கும் அலைபேசிகளும் நம்மைப் பயன்படுத்திக் கொண்டிருக்கின்றன.

ஓய்வான நேரத்தில் தொலைக்காட்சி பார்த்தால் அதுவும் அரை மணி நேரம் அல்லது ஒரு மணி நேரம் என்ற அளவோடு பார்த்தால் அல்லது தேவை கருதி பார்த்தால் தொலைக்காட்சியை நாம் பயன்படுத்திக் கொண்டிருக்கிறோம். அலைபேசிக்கும் அது அப்படியே பொருந்தும். தேவை கருதியோ அல்லது ஓய்வான நேரத்தில் பொழுதுபோக்காகப் பார்த்தாலோ நாம்தான் அலைபேசியைப் பயன்படுத்திக் கொண்டிருக்கிறோம்.

மிக முக்கியமான வேலையைச் செய்ய வேண்டிய நெருக்கடியில் அந்த வேலையை ஒத்தி வைத்து விட்டு பொழுதுபோக்காகத் தொலைக்காட்சியையோ அலைபேசியையோ நோண்டிக் கொண்டிருந்தால் தொலைக்காட்சியும் அலைபேசியும் நம்மைப் பயன்படுத்துவதாகத்தான் அர்த்தம்.

உங்களை அறியாமல் நீங்கள் தொலைக்காட்சி பார்ப்பதையோ அலைபேசியை எடுத்து நோண்டுவதையோ செய்து கொண்டிருந்தால் நீங்கள் உங்கள் கட்டுபாட்டில் இல்லை. நீங்கள் அக்கருவிகளின் கட்டுபாட்டில் சென்று விட்டீர்கள். நீங்கள் உங்களை உங்கள் கட்டுபாட்டில் வைத்துக் கொள்வது நல்லது. கருவிகளின் கட்டுபாட்டில் உங்களை விடுவது ஆபத்தானது. அது ஒருவகை அடிமைத்தனம். சுகபோகத்திற்கு உங்களை விற்றுக் கொள்ளும் அடிமைத்தனம். இது கருவிகளுக்கும் பொருந்தும், வஸ்துகளுக்கும் பொருந்தும்.

பயன்பாடு பொதுவாக நம் கட்டுபாட்டில் தொடங்கி அதன் கட்டுபாட்டில் நாம் போய் சிக்கிக் கொள்வதாகத்தான் மாறுகின்றன. கொஞ்சம் விழிப்போடும் எச்சரிக்கையோடும் இருந்ததுதான் இதைத் தடுத்துக் கொள்ள வேண்டும்.

எதற்கும் ஓர் அளவு இருக்கிறது, அளவுக்கான கணக்கும் இருக்கிறது என்பதைப் புரிந்து கொண்டு அந்த அளவோடும் கணக்கோடும் நிறுத்திக் கொள்ளும் கட்டுபாட்டையும் பக்குவத்தையும் ஒரு பழக்கமாக வளர்த்துக் கொள்ள வேண்டும்.

ஆகவேத்தான் சொல்கிறேன், தொலைக்காட்சியையும் அலைபேசியையும் நாம்தான் பயன்படுத்துகிறோமா என்பதை உறுதி செய்து கொள்ள வேண்டும் என்று. அவை நம்மைப் பயன்படுத்திக் கொண்டிருக்கிறதா என்பதை அடிக்கடி கண்காணித்துக் கொள்ள வேண்டும் என்றும் கூறுகிறேன்.

இந்தக் கூற்றில் உங்களுக்கு உடன்பாடு இல்லாமல் கூட இருக்கலாம். அது ஒரு பெரிய பிரச்சனையில்லை. ஆனால் இந்தக் கூற்றை நீங்கள் பரிசீலனை செய்து பாருங்கள். அது அப்படியில்லை என்றால் அப்படியே விட்டு விடலாம்.

*****