வள்ளல்களின் தேடல்

வள்ளல்களின் தேடல்

எதுவும் தரப் பிரியப்படாத நீ

வள்ளலெனப் புகழப்பட வேண்டுமென்ற

ஆசையில் இருந்தாய்

புகழுக்கெனச் செலவு செய்யவும் பிரியமாய் இருந்தாய்

புலவர்களைக் கூட்டி வந்தாய்

பாடகர்களை அழைத்து வந்தாய்

இசைப்பவர்களை இழுத்து வந்தாய்

நாட்டியக்கார்களைக் கொண்டு வந்தாய்

புலவர்கள் இட்டு கட்ட

பாடகர்கள் ராகம் கூட்ட

இசைப்பவர்கள் சுதி சேர்க்க

நாட்டியக்காரர்களின் சலங்கை தெறிக்க

ஒரே நாளில் வள்ளல் என ஆனாய்

யாருக்கும் கொடுக்காமலா

பாடல் பிறந்திருக்கும் என்ற நம்பிக்கையில்

இன்றும் வள்ளல் எனப் பாடப்படுகிறாய் நீ

அந்தக் கலைஞர்கள் போன திசையை

இன்றும் தேடிக் கொண்டிருக்கிறார்கள் வள்ளல்கள்

*****