மகிழ்ச்சியின் ரகசியத்தோடு நேசிக்கும் பெண்ணொருத்திக் காத்திருக்கிறாள்

மகிழ்ச்சியின் ரகசியத்தோடு

நேசிக்கும் பெண்ணொருத்திக் காத்திருக்கிறாள்

என் மகிழ்ச்சியின் ரகசியம் என் தோட்டம்

அந்தத் தோட்டத்தில்

உன் இதயத்திற்காக

இதயத்தின் இதழ்களைப் போல ரோஜாக்கள் பூக்கின்றன

உன் கருங்கூந்தலுக்காக வெண் மல்லிகைகள் பூக்கின்றன

நீ கைகளில் ஏந்திக் கொள்வதற்காக

தடாகத் தாமரைகள் மலர்ந்திருக்கின்றன

உன் இதழ்களோடு பேசுவதற்கென்று

செண்பகப் பூக்கள் பூத்திருக்கின்றன

உன் நுகர்தலுக்குக் கெடுதல் செய்யாத வகையில்

கனகாம்பரங்கள் பூத்துக் குலுங்குகின்றன

கடலையும் வானத்தையும்

உன் கண்களுக்குக் காட்டுவதற்கென்றே

டிசம்பர் பூக்கள் பூத்துச் சிரிக்கின்றன

நான் இந்தத் தோட்டத்தைப் பார்த்துக் கொள்கிறேன்

உன்னைப் பார்த்துக் கொள்வதைப் போல

உன்னைப் பார்த்துக் கொள்வதும்

இந்தத் தோட்டத்தைப் பார்த்துக் கொள்வது போலத்தான் எனக்கு

இந்தத் தோட்டமாக நீயும்

நீயே இந்தத் தோட்டமாகவும் இருக்கையில்

என் மகிழ்ச்சிக்கு என்ன குறையிருக்கப் போகிறது

நான் எல்லாரிடமும் சொல்கிறேன்

உங்கள் மகிழ்ச்சிக்கான தோட்டத்தை உருவாக்குங்கள்

உங்களை நேசிக்கும் பெண்ணொருத்திக் காத்திருக்கிறான் என்று

*****