எல்லாரும் பெரிய மனுஷன் என்று பெயர் எடுக்கலாமே

எல்லாரும் பெரிய மனுஷன் என்று பெயர் எடுக்கலாமே

அடிப்பார்கள் உதைப்பார்கள்

தூக்கிப் போட்டு மிதிப்பார்கள்

இருப்பதை ஒழுங்கு மரியாதையாக இரு

இல்லை வீட்டை விட்டு ஓடு என்பார்கள்

பெற்றெடுத்த பிள்ளைகள்

சோறு போட மாட்டாள்

கண்டபடி திட்டுவாள்

கெட்ட வார்த்தை கூறுவாள்

கூசி நிற்பதை ரசித்துப் போவாள்

கூனி நிற்பதை இளித்துக் கொண்டு போவாள்

வாக்கப்பட்டு வந்த மருமகள்

வீடடங்கி இருந்தாலென்ன

வயசான காலத்தில் ரோஷமென்ன

பொசுக்குன்னு கௌம்பி வந்திடுறீயே

செருப்பால் அடிப்பது போல

சொல்லால் அடிப்பாள் செல்ல மகள்

எல்லாவற்றையும் பொறுத்துக் கொண்டு

நாய்க்குப் போடும் சோற்றை

நாக்கு ருசிக்க தின்று கொண்டு

ஒன்றும் சொல்லாமல்

ஊருக்குள் இருந்தால்

பொறுமையான மனுஷனப்பா என்று

பார்ப்போர் போற்ற வாழலாமே

எல்லாரும் பெரிய மனுஷன்

என்ற பெயரை வாங்கலாமே

*****