ஏன் இப்படியெல்லாம் நடக்கிறது

ஏன் இப்படியெல்லாம் நடக்கிறது

தவறவிட்டதைக் கண்டெடுத்தவர்

கொண்டு வந்துக் கொடுக்கிறார்

திருடிப் போனவர் திரும்ப வந்து

திருப்பிக் கொடுத்து விட்டுப் போகிறார்

ஏமாற்றியவர் எடுத்துக் கொண்டதைப்

பாதம் பணிந்து சமர்ப்பிக்கிறார்

வேண்டிக் கொண்டவுடன் சாமிகள்

வேண்டுதல்களை நிறைவேற்றித் தருகிறார்கள்

வாக்குறுதி அளித்தபடி தலைவர்கள்

திட்டங்களைத் தீட்டிச் செயல்படுகிறார்கள்

தவறென்று தெரிந்தால் தட்டிக் கேட்கிறார்கள்

தவறுக்கு மன்னிப்பு கேட்கிறார்கள்

சின்னதொரு பிழைக்கும் குற்றவுணர்ச்சியில்

குமைந்து உருக்குலைந்து போகிறார்கள்

ஆபத்தென்றால் ஓடி வந்து உதவுகிறார்கள்

இப்படியெல்லாம் நடந்தால் நன்றாகவா இருக்கும்

உங்களுக்கு அலட்சியம் அன்றோ அதிகமாகி விடும்

எல்லாவற்றையும் யாரோ பார்த்துக் கொள்வார்கள்

என்றல்லவோ இருந்து விடுவீர்கள்

உங்களை இயக்க வைக்க வேண்டுமென்றால்

எல்லாம் நடந்தாக வேண்டும்

எல்லாம் என்றால் எல்லாம்தான் நடந்தாக வேண்டும்

*****