நொடிக்கொரு தரம் மின்னும் தலைப்புச் செய்திகள்

நொடிக்கொரு தரம் மின்னும் தலைப்புச் செய்திகள்

சக்கரத்தின் காலடியில் நசுங்கும் உயிரின் இறகுகள்

காற்றின் சிறகுகளில் படபடக்கின்றன

வலியின் ஒலியைப் பரப்பியபடி

பக்கவாட்டில் நகர்ந்தவாறு செல்கிறது பிதுங்கிய இதயம்

பயணங்களில் விபத்துகள் முடிவதில்லை என்ற

வாசகத்தை உமிழ்ந்தவாறு செல்கிறார் வழிபோக்கர்

வேகம் கொள்ளும் சாபத்தைத் திரும்ப பெற்றுக்கொள்ளுமாறு

சக்கரங்கள் கடவுள்களிடம் மண்டியிடுகின்றன

உரிய நேரத்தில் வேலை செய்யாமல் போகும்

தடைகளைத் தண்டிக்குமாறு கோரிக்கைகள் பறக்கின்றன

கடவுளின் செவிகளில் எதுவும் ஏறுவதாகத் தெரியவில்லை

உயிரைத் துறந்து விட்ட ஆத்மாக்களை

அரவணைத்துக் கொள்வதோடு

அன்றைய பொழுது இரத்தக் கவிச்சியோடு முடிகிறது

மறுநாள் பொழுதின் மற்றொரு கவிச்சை வாடையை

பிறிதொரு விபத்துத் துவங்கி வைக்கிறது

நடப்பவற்றை வேடிக்கை பார்ப்பதோடு

கடவுளின் செயல் முடிந்து விடுவதாக அறிவிக்கப்படுகிறது

கடவுளிடம் செல்லப் போகும் உயிர்களைக் காப்பதற்காக

மருத்துவர்கள் போராடிக் கொண்டிருப்பதாகத்

தலைப்பு செய்திகள் நொடிக்கொரு தரம் மின்னுகின்றன

*****