மூப்படையாத பெருவெளி

மூப்படையாத பெருவெளி

சிறு குழந்தைகள் விநோதமாகக் கேள்வி கேட்கிறார்கள்

விடை தேடி காட்டுப்பெருவெளியில் தொலைகையில்

தேவதையின் கரங்களோடு விடை கூறி மீட்கிறார்கள்

அருகில் இருக்கும் தட்டுப்படாத மருந்தை

நெடுந்தூரம் தேடி அலைந்து விட்ட களைப்பை

புன்சிரிப்பால் மீட்கும் குழந்தைகள்

அடுத்ததொரு வெடிச்சிரிப்பைப் போட்டு

அடுத்த முறை வரும் போது

இன்னும் பல நுணுக்கங்களைத் தருவதாய் வாக்களிக்கிறார்கள்

பால்யத்தில் உறையாத காலத்தை நொந்தபடி வரும்

பாதையெங்கும் நோக்குகையில் பார்வையில் படும்

பறவைகளும் மரங்களும் ஏதோ ஒன்றை வினாவி

விடையொன்றை நல்குவதாய்த் தோன்றும் தோற்றத்தில்

பால்யத்தில் உறைந்துக் கிடக்கிறதிந்த

மூப்படையும் மனிதர்களைத் துரும்பெனக் கொண்டிருக்கும்

மூப்படையாத பிரபஞ்சம்

*****