வனாந்திரத்தில் மகிழ்ச்சியாய் இருந்த நாட்கள்

வனாந்திரத்தில் மகிழ்ச்சியாய் இருந்த நாட்கள்

புல் தின்ன மறந்த மாடுகளும் ஆடுகளும்

சுவரோட்டிகளைத் தின்ற காலம் வரை நன்றாக இருந்தன

பாலிதீன்களைத் தின்னும் காலம் வந்த பின்

ஒவ்வொன்றாக வயிறு வீங்கிச் சாகத் தொடங்கின

காட்டினின்று அழைத்து வந்த மாடுகளும் ஆடுகளும்

இப்படித்தான் அழிந்து போகத் தொடங்கின

வீடங்கி கிடந்த பூனைகளும் தெருவடங்கிக் கிடந்த நாய்களும்

பாழாய்ப் போன மீந்த உணவைத் தின்ற காலம் வரை

யாதுமொரு குறையுமின்றி அலைந்து திரிந்தன

தூக்கி எறியப்படும் பாலீதீன் பைகளில்

உணவைத் தேடத் தொடங்கிய பின்

மலடாகிச் சந்ததிகளின்றிச் சாவத் தொடங்கின

காட்டினின்று மனிதரை நம்பி வந்த நாய்களும் பூனைகளும்

இப்படித்தான் நம்பிக்கை துரோகத்தால் மாண்டு போயின

இதற்கு முன்பே குதிரைகளும் கழுதைகளும்

வாதையின்றி நிர்கதியாய்ப் போய்ச் சேர்ந்த பாக்கியத்தில் இருந்தன

நம்பினார் கெடுவதில்லை என்ற வாசகம் பொய்த்து புழுபுழுத்துப் போக

வனாந்திரத்தில் மகிழ்ச்சியாய் இருந்த நாட்களை

எண்ணிப் பார்க்கின்றன பிராணிகளின் ஆத்மாக்கள்

*****