மனதைத் திருகும் திருகாணி

மனதைத் திருகும் திருகாணி

காணாமல் போன காதணியின் திருகாணி

தண்ணீர்க் குடத்தின் அடியில் தங்கும் கறையைப் போல

மனதில் அடியில் தங்கி விட்டது

தொலைத்த இடம் அறியாது

காணுமிடங்களில் எல்லாம் தேடச் சொல்கிறது

ஈராண்டுகள் மும்மாதங்கள் நான்கு நாட்கள்

கடந்த பின்னும் நினைவு வரும் போதெல்லாம்

திருகாணியின் தேடல் தொடர்கிறது

எதேச்சையாய்த் தேடுதல் வழக்கமான பின்

சந்து பொந்து இண்டு இடுக்கு எல்லாம்

புதையலின் ரகசியப் பாதைகளாய்த் தெரிய

தேடித் தேடி ஓயும் பொழுதுகளில்

பீடை தொலைந்ததென ஆறுதல் கொள் என்பாள் அம்மா

காணாமல் போகாதிருந்திருக்க

காதோடு சிறு பெட்டியொன்றைச் செய்திருக்கலாம் என

கிண்டல் செய்து விட்டுப் போவார் அப்பா

தோடு தப்பித்துத் திருகாணியோடு போனதே என்பார் மாமா

தொலைத்த பொருள் கிடைக்காமல் போகாது என

அணுக்கமாய் வந்து ஆறுதல் சொல்வாள் அத்தை

கடந்துகொண்டிருந்த நாட்கள் ஒன்றில்

திருவிழாவில் தொலைந்த பிள்ளை

தானாய்த் திரும்பி வந்ததைப் போல

திருகாணி கிடைத்த பின்னும்

அவ்வபோது தன்னை அறியாமல்

ஆங்காங்கே திருகாணியைத் தேடும் மனதை மட்டும்

எங்கே தொலைப்பதென்று தெரியவில்லை

*****