மர்மச் சுமைகள்

மர்மச் சுமைகள்

வாழ்வின் தீராத மர்மங்கள்

காலத்தின் காலடிக் கட்டளையை மீறாதவைகள்

இந்த இரவுக்குப் பின்

உயிரோடு இருப்பதும்

உயிர் பிரிவதும்

விடியலுக்குப் பின்னே வெளியாகும்

மர்ம முடிச்சுகளை அவிழ்க்க நினைப்பவர்களை

மர்மத்தோடு கொலை செய்கிறது காலம்

பிறகு என்ன நினைக்குமோ, ஏது நினைக்குமோ

அப்பட்டமாய் அனைத்தையும்

அவிழ்த்துப் போட்டு விட்டு சிரிக்கும்

எளிய உண்மைகளால் ஆனது வாழ்க்கை என்றால்

நீங்கள் கோபப்படக் கூடாது

முடிச்சுகளைப் பின்னியவர்கள் அவரவர்கள் என்பது

மெதுமெதுவாக வெளியாகும்

பாவம்,

எல்லா பழியையும் மர்மமாய்ச் சுமந்து நிற்கும்

ஏதுமறியாதவன் போல் கடந்து கொண்டிருக்கும்

எது பற்றியும் அறிய விரும்பாத காலம்.

*****