மன்னார்சாமியின் கடமைகள்

எல்லை

எல்லைகளைக் கடப்பதும், துறப்பதும்

எளிதென்ப

பறவைகட்கும்,

சிறகுள்ள மனிதர்கட்கும்.

*****

மன்னார்சாமியின் கடமைகள்

சூரியனை எழுப்பி விட்டு

டிராக்டரை எடுத்துக் கொண்டு

அதிகாலையில் உழச் சென்றால்

பதினொரு மணிக்குச் சாப்பிட வந்திடுவார்

பழையச் சோற்றோடு கருவாட்டுக் குழம்பை

வாசம் கொள்ள

சப்புக் கொட்டிச் சாப்பிடும் மன்னார்சாமி.

நாலிரண்டு வருடமாய்ப் பொய்த்துப் போன

குறுவைச் சாகுபடியால்

டிராக்டர் ஓட்டும் அனுபவத்தைக் கைக்கொண்டு

பக்கத்து டவுனுக்கு

தண்ணீர் லாரியில் சப்ளை முடித்து விட்டு

பதினொரு மணிக்கு

வரும் வழியில் இருக்கும்

டாஸ்மாக்கில் வயிறு முட்டக் குடித்து விட்டு

கருவாட்டுக் குழம்பு சரியில்லையென்று

அடிக்கிறான் கருவாட்டைப் போல

மெலிந்து சுருங்கிக் கிடக்கும்

தன் மனையாளை ஈவு இரக்கமின்றி.

*****