ஒரு துளியில் ஒளிந்திருக்கும் சமாதானம்

ஒரு துளியில் ஒளிந்திருக்கும் சமாதானம்

அழுவதைப் போன்ற சமாதானம் ஏதுமிருக்கிறதா

தயவுசெய்து கொஞ்சம் அழ விடுங்கள்

ஆறுதல் சொல்லாதீர்கள்

உங்கள் ஆறுதல்கள்

அதுவாகக் கிட்டக்கூடிய சமாதானத்தை

பல மைல் தூரம் தள்ளி வைக்கின்றன

அன்பையும் அரவணைப்பையும்

தள்ளி வைக்க கற்ற சூட்சமங்கள் மொழிகள்

இப்படிச் சொல்வதால் தவறாக நினைத்துக் கொள்ளாதீர்கள்

ஆறுதல் மொழிகள் அவ்வளவு மோசமானவை

மன மென்மையைப் புரிந்து கொள்ளும் வல்லமையற்றவை

உங்கள் ஆறுதலைப் புரிந்து கொள்ள

என்னைப் பார்த்ததும் நீங்கள் சிந்தும்

ஒரு துளி கண்ணீர் போதும்

அந்த ஒற்றைத் துளியின் ஆறுதலில்

கொதிக்கும் சூரியனும் சமாதானமடைந்து விடும்

உங்கள் ஒற்றை மொழியோ

உருகி உறைந்திருக்க வேண்டிய பனித்துளியைக்

கொதிக்க வைத்து விடுகிறது

*****