வழிகளைத் திறந்து கொள்ளும் இயற்கை

வழிகளைத் திறந்து கொள்ளும் இயற்கை

இயற்கை வழியொன்றைக் கேட்கிறது

அது எந்தக் காலத்திலும் எச்சரிப்பதில்லை

மறிக்கப்படும் வழிகளை இயற்கை திறந்து கொள்கிறது

வழிகளை மாற்றுவதும் பூட்டுவதும் மனிதர்களின் வேலை

திறப்புகளை உருவாக்கிக் கொள்வது இயற்கையின் இயற்கை

வெள்ளங்கள் பயமுறுத்தும் போது

இயற்கை கேட்பதெல்லாம் வழிந்தோடுவதற்கான வழிகளை

புயல்காற்று வீசும் போதெல்லாம்

இயற்கை கேட்பதெல்லாம் காற்றுக்கான தடையற்ற பாதைகளை

பூகம்பப் பொழுதுகளில்

இயற்கை கேட்பதெல்லாம் ஆட்டத்தை மறிக்காத வழிகளை

சுனாமியின் கணங்களில்

இயற்கை கேட்பதெல்லாம் கரைவெளிகளின் வழிகளை

இயற்கையின் விருப்பமெல்லாம் திறந்து கிடக்கும் வழிகள்

வழிகள் அடைபடும் போது இயற்கை திறந்து கொள்கிறது

*****