விலங்குலக மனிதர்கள்

விலங்குலக மனிதர்கள்

அழைப்பொலிகளின் மேல் வெறுப்பு வந்து நாளாகி விட்டது

சொந்த விதிகளுக்காகப் பொது விதிகளை தளர்த்தக் கோருபவர்கள்

மழைக்காலக் கொசுக்களைப் போல அதிகமாகித்தான் விட்டார்கள்

அவரவர் காரியம் அவரவர்க்கு மலையெனப் பெரிதாகையில்

பொது காரியம் துரும்பெனச் சிறிதாகி விடுகிறது

ஊர்த்தாகம் தணிவதினும்

ஒற்றை மனிதரின் தாகம் தணிவது முக்கியம் என்பது

அதிகாரத் தாண்டவத்தின் சாட்சியம்

பொதுவாகப் பொது விதிகள் மற்றவர்களை மிரட்டுவதற்காக

மற்றும் அவர்கள் மட்டும் மீறுவதற்காக

கூச்ச நாச்சமின்றி சுயநலம் பேசுவோர்

அடுத்தவர்களை அம்மணமாய் அலைய விடுவதை

அற்புதமான வேடிக்கையென விளம்புகிறார்கள்

யார் எக்கேடு கெட்டுப் போனாலென்ன

அவர்கள் நலமொன்றே உலக நலமாகி விடுவதாக

அவர்கள் அருமையாகப் பிரசங்கிக்கிறார்கள்

தனக்கென ஊளையிடும் ஓநாய்கள் உலகமெங்கும் இருக்கின்றன

என்றாலும் நம்பிக்கை இழக்க வேண்டியதில்லை

விலங்குலகத்தில் ஒன்றான மனிதருலகத்தில்

ஒரு மனிதரை உலகம் அரிதாக எப்போதாவது சந்திக்கத்தான் செய்கிறது

*****