பொறுப்பைச் சுமக்கும் கடவுளர்கள்

பொறுப்பைச் சுமக்கும் கடவுளர்கள்

கரை பெயர்ந்து கொண்டிருக்கிறது என்பவர்கள்

ஆழம் குறைந்து கொண்டிருப்பதை  நம்ப மாட்டார்கள்

சிறகுகளில் அடித்தால் வானத்துக்கு வலிக்குமா என்பதை

சந்தேகத்துடன் எதிர்கொள்வார்கள்

சாத்தியமான வகைகளில் மட்டுமா எல்லாம் நிகழும்

அசாத்தியமான நிகழ்வுகள் வேதனையைக் கூட்டுகின்றன

இப்படி நிகழ வேண்டும் என்ற நம்பிக்கை

எப்படியோ வேரூன்றி பிரார்த்தனைகளாய் ஒலிக்கின்றன

கடவுள்கள் நம்பிக்கையின் காவலர்களாய்

பொறுப்பு சுமந்து அயர்ந்து போகிறார்கள்

ஏதோ ஒன்று நடப்பதை ஏற்றுக் கொண்டு விட்டால்

மௌனங்களில் உறைந்து விடுகிறது உலகம்

எண்ணங்கள் பெயர்ந்த பின்

யாதொன்று பெயர்தலும் பொருட்டாகாதோ என்னவோ

முழுச்சுற்று முடிந்தாலும் மறுசுற்றுக்குத் தாயாராகின்றன சக்கரங்கள்

*****