கள் வடியும் பூக்கள்

கள் வடியும் பூக்கள்

கவர்ச்சி ஆடை என்றார்கள்

சிக்கனத்தைக் கற்றுத் தருகிறீர்கள் என்றேன்

துள்ளல் நடனம் என்றார்கள்

சுறுசுறுப்பைக் கற்றுத் தருகிறீர்கள் என்றேன்

முத்தக் காட்சி என்றார்கள்

காதலைக் கற்றுத் தருகிறீர்கள் என்றேன்

குளியறையில் ஒரு காட்சி என்றார்கள்

சுத்தம் சுகாதாரத்தைக் கற்றுத் தருகிறீர்கள் என்றேன்

படுக்கையறையிலும் ஒரு காட்சி என்றார்கள்

பாலியல் கல்வியைக் கற்றுத் தருகிறீர்கள் என்றேன்

நாயகன் அறைவதாய் ஒரு காட்சி என்றார்கள்

கன்னம் சிவக்கும் சிவப்பழகைப் பெற்றுத் தருகிறீர்கள் என்றேன்

கதையின் முடிவில் இறந்து விடுகிறீர்கள் என்றார்கள்

நல்லவேளை மோட்சம் தந்தீர்கள் என்றேன்

இன்னும் பத்து வருடத்திற்கு அசைக்க முடியாது என்றார்கள்

என் கதையை நீங்களே எழுதுங்கள் என்றேன்

அன்று தொடங்கி இன்று வரை கதை எழுதிக் கொண்டிருக்கிறார்கள்

தசாப்தங்கள் கடந்து கொண்டிருக்கின்றன

நாங்கள் வந்து கொண்டிருக்கிறோம்

பூக்களில் கள் வடியும் கதைகள் பிறந்து கொண்டிருக்கின்றன

*****