விஷக் குறியீடு
விஷமில்லாதிருந்தால் பாம்புகளை
வளர்ப்போர்
பல்கிப் பெருகியிருக்கலாம்
மீன்களைப் போல பாம்புகளும்
மனிதர் உணவாகிப் போயிருக்கலாம்
விஷம் என்ற புள்ளி அன்றோ
உருவாக்குகிறது
பாம்புகளுக்குப் பயப்படும்
மனிதர்களையும்
மனிதர்களுக்குப் பயப்படும்
பாம்புகளையும்
மனிதர்களைக் கொல்வது பாம்பின்
விஷமென்றால்
பாம்புகளைக் கொல்வது மனிதர்களின்
விஷமன்றோ
புற்றடிக் கோயில்களைக் காண்கையில்
நாகம்மாள் நாகராசு எனும்
பெயர்களை கேட்கையில்
விஷத்தின் மீதான பயமன்றோ
பாம்புகளின் மீதான பிரியமாகத்
தோற்றம் தருகிறது
எலிகளை விழுங்கும் விஷமற்ற
பாம்புகள் இருந்தால்
எல்லா வீடுகளிலும் பூனைகளுக்குப்
பதில்
பாம்புகள் செல்லப் பிராணியாகியிருக்கும்
பாவம் பூனைகள் பாம்புகளைச்
சபித்தபடி திரிந்திருக்கும்
*****
No comments:
Post a Comment