யுகாந்திரங்களின் காட்சி

யுகாந்திரங்களின் காட்சி

நெடுங்காலமாக இவர்கள் பேசிப் பேசியே

விதவிதமாக ஏமாற்றிக் கொண்டு இருக்கிறார்கள்

பொய்களை வாக்குறுதிகளாக அளிக்கிறார்கள்

தவறுகளைச் சாமர்த்தியமான வார்த்தைகளில் புதைக்கிறார்கள்

இயலாமைகளைச் சாதனைகளாகப் பிரகடனம் செய்கிறார்கள்

ஆக வேண்டிய காரியம் குறித்து மௌனம் சாதிக்கிறார்கள்

ஒப்பந்தம் மீறப்பட்டது குறித்து அமைதி காக்கிறார்கள்

சரியும் தவறும் எதுவென்று அவர்களுக்குத் தெரியும்

தவறுகளைச் சரியென்று சொல்வதில்தான்

அவர்களின் அதிகாரம் அடங்கியிருக்கிறது

சரியானவற்றைத் தவறென்று நிரூபிப்பதில்தான்

அவர்களின் சாசுவதங்கள் நிறைந்திருக்கின்றன

வாய் வார்த்தைகளை வாழ்க்கையாக

முடித்து விட முடியும் என்ற நம்பிக்கை அவர்களுக்கு இருக்கிறது

அதற்கேற்ப ருசி என்று சொன்னால் வயிறு நிறைந்து விட்டதாக

நாங்கள் நடித்துக் காட்ட வேண்டியதாக இருக்கிறது

நடித்துக் காட்டுவதை உலகம் உண்மையென

யுகாந்தரம் யுகாந்திரமாக நம்பிக் கொண்டிருக்கிறது

*****