பறவைகளை விரும்பினால் மரங்களை நடுங்கள்

பறவைகளை விரும்பினால் மரங்களை நடுங்கள்

மரங்களின் இருப்புக் குறித்த கவலையின்றி

பறவைகள் பறந்து கொண்டிருக்கின்றன

மரங்கள் இருந்தால் தரையிறங்கும்

இல்லாது போனால் வானக்கிளைகளில் சிறகடித்துக் கொண்டிருக்கும்

விதைகள் முளை விடுவதற்கான தளங்களைக்

காங்கிரீட் களங்கள் அடைத்துக் கொண்டிருக்கின்றன

அவ்வபோது விழும் பறவைகளின் எச்சங்கள்

வீணாய் விழுந்து கொண்டிருக்கின்றன

பறவைகள் எங்கும் நிற்காமல் பறப்பது குறித்து

யாருக்கும் எந்தக் கவலையும் இல்லை

பறவைகள் அவசரப்பட்டுத் தரையிறங்கினால்

பிடிசோறு வைக்க வேண்டுமோ என்ற

அச்சத்தில் இருக்கிறார்கள் மனிதர்கள்

பறவைகளோ

கடந்த காலத்தின் மனிதர்களை மறந்து போயிருக்கின்றன

நிகழ்கால மனிதர்களை அச்சத்தோடு விலக்குகின்றன

எதிர்கால மனிதர்கள் குறித்த எண்ணம் பறவைகளுக்கு இல்லை

ஒருவேளை மனிதர்கள் பறவைகளை விரும்பினால்

தூரத்தில் இருந்தபடியே விரும்புங்கள்

முடியுமானால் மரமொன்றை நட்டு வையுங்கள்

நீங்கள் நட்டு வைத்த மரத்தின் மேல்

பறவைகள் அமர்வது என்பது உங்கள் மேல் அமர்வதாகும்

*****