அழகிய நேர்த்தியான உருண்டை

அழகிய நேர்த்தியான உருண்டை

முடியாது என்பதற்காக விட்டு விட முடியாது

முடிந்த மட்டும் எதிர்மறை எண்ணங்கள் கொள்ளலாம்

ஆனால் செய்துதான் ஆக வேண்டும்

அது நிறைவேற்றப்பட வேண்டிய பட்டியலில் இருக்கிறது

ஏதோ ஒன்று தவறாகி விடலாம்

ஏதோ அந்த ஒரு தவறுதான் அத்தனையையும்

ஒட்டுமொத்தமாக நிலைகுழையச் செய்யலாம்

எல்லாவற்றிலும் இப்படித்தான்

ஏதோ ஒரு தவறுதான் எல்லாவற்றையும் வீழ்த்துகிறது

வீழ்ந்தாலும் வீரமோடு எழுந்த நிற்க வேண்டும்

நேர்ந்து விட்ட சிறு தவறுக்காகக் கண்ணீர் உகுக்கக் கூடாது

அது அப்படித்தான் தவறுகள் நேர்ந்து கொண்டே இருக்கும்

முயற்சிகளும் தொடர்ந்து கொண்டிருக்கும்

இயங்கிக் கொண்டிருப்பதைத் தவிர வேறு வழியேது

ஒவ்வொன்றையும் ஒரு தவறுக்காக நிறுத்த முனைந்தால்

உலகம் சுற்றுவதும் நின்று போகலாம்

காலத்தின் அச்சில் சுழன்று கொண்டிருக்கையில்

தவறுகள் தேய்ந்து மறைந்துப் போகின்றன

கையில் இருப்பது அழகிய நேர்த்தியான உருண்டை

*****