கதவுகள்

கதவுகள்

மோனநிலையில் இருப்பதாகச் சொன்னார்கள்

நானோ நோயுற்ற துயரத்தைச் சுமந்தவனாய்

எதையும் சொல்ல முடியாத நிலையில் இருந்தேன்

அடைபட்ட நீர் ஒழுகுவதைப் போல

வார்த்தைகள் கசிந்தபடி வெளிவந்தன

உடலெங்கும் பிரவகித்த வலியில்

இடம் சுட்டி வலி விளக்கம் செய்ய இயலாதிருந்தேன்

கையில் இருந்த பணத்துக்கும்

மருத்துவர் சொன்ன கட்டணத்துக்கும் நிலவிய வேறுபாட்டால்

அரைகுறை சிகிச்சையோடு திருப்பி அனுப்பப்பட்டேன்

சில நாட்கள் வரை தின்ற மருந்துகளில்

நோய் வெருண்டோடுவதோ அல்லது

மருந்துகளின் போதாமையால்

நோய் என்னைத் தின்று கொள்வதோ

காலத்தின் கரைகளில் ஒதுங்கப் போகும் துரும்பு

யார் இதற்கென குற்றவுணர்ச்சி கொள்ளப் போகிறார்கள்

கட்டணங்கள் தீர்மானிக்கும் உலக நியதிகளின்படி

பணம் இல்லாத ஒருவருக்கு மோட்சத்தின் கதவுகள்

எந்நேரமும் திறந்தே இருக்கும்

பணம் இருக்கும் ஒருவருக்குச் சிகிச்சையின் கதவுகள்

எந்நேரமும் திறந்தே இருக்கும்

*****