நிறங்களின் பேரேடு

நிறங்களின் பேரேடு

விளக்குகளின் வெளிச்சத்தில் நிறங்கள் ஏமாற்றுகின்றன

விளக்கு வெளிச்சத்தில் தெரியும் நிறம் ஒன்றாகவும்

சூரிய வெளிச்சத்தில் தெரியும் நிறம் வேறொன்றாகவும் ஆகி விடுகின்றன

நிறங்களை பச்சோந்தி என்பதா

வெளிச்சங்களை பச்சோந்தியின் தாய் என்பதா

ஒரு வண்ண கண்ணாடி சில நிறங்களை உறிஞ்சிக் கொள்கிறது

ஆதிக்க பரம்பரையின் வாரிசுகளைப் போல

வெள்ளை நிறம் எந்த வெளிச்சத்திலும் ஏமாற்றுவதில்லை

கறையைப் பளிச்செனக் காட்டி முகம் சுளிக்க வைத்து விடுகின்றது

கருப்புத் தோலுக்கு வெளிர் நிறமும்

சிவந்த தோலுக்கு அடர் நிறமும்

அம்சமாய்ப் பொருந்திப் போவதாய்ப் பேசிக் கொள்கிறார்கள்

தக்காளி நிறம் போல சிவந்த தோலுடைய ஒருத்தி

கருத்த ஆடவனைக் கைபிடித்து வரும் போது

பொருத்தம் போதவில்லை என அங்கலாய்த்துக் கொள்கிறார்கள்

துணிக் கடைகளில் பல வண்ண சேலைகளை

வானவில்லின் லாவகத்தோடு எடுத்துப் போடும் முதியவர்

வெள்ளை வேட்டியும் வெள்ளைச் சட்டையும் அணிந்திருக்கிறார்

வெள்ளை ஒளியிலிருந்து ஏழு நிறங்கள் பிரிவதைப் போல

நிறங்களைச் சட்டெனத் தேர்ந்து விடுவதில்லை மனிதர்கள்

கொஞ்சம் யோசிக்கிறார்கள் மனக்கண்ணாடியில் பார்த்தபடி

நிறைய நிறங்களைத் தேடிப் பார்க்கிறார்கள்

நிறப்பசியோடு அலையும் வேங்கையைப் போல

முடிவில் தேர்ந்து கொள்ளும் நிறம் பிடிக்காத போது

வேறு இடங்களில் தங்களுக்கான நிறங்களைத் தேடுகிறார்கள்

மனிதர்கள் தேடி வரட்டும் என்று வெவ்வேறு நிறங்களைக் காட்டும்

வெளிச்சம் கொஞ்சம் கொஞ்சமாய் இருளும் போது

சலிப்பும் அலுப்பும் அதுவாக ஒரு நிறத்தைத் தேர்ந்து கொள்கிறது

நிறத்தைத் தேர்ந்து கொண்ட பிறகு அது குறித்த பிரக்ஞை அழிந்து போகிறது

யாரோ ஒருவர் சுட்ட வேண்டியிருக்கிறது சூடியிருக்கும் நிறங்களை

*****