உயிர்த்திருப்பதன் அதிசயங்கள்

உயிர்த்திருப்பதன் அதிசயங்கள்

எப்போதும் என்னைப் பார்த்துக் குரைக்கும் நாய்

திருடர்களைத் தவற விடுகிறது

மீன் குழம்பின் வாசனைக்கு வந்து விடும் பூனை

சகல எலிகளையும் தப்ப விட்டு விடுகிறது

கொளுத்தி வைத்த கொசுவர்த்தி

வெளிக் கொசுக்களை உள்ளிழுத்துக் கொண்டிருக்கிறது

பசி தீர்க்க வாங்கி வைத்த தோசை மாவில்

பல்லியொன்று செத்துக் கிடக்கிறது

படுக்கை விரிப்பை விரித்துப் போடுகையில்

உறக்கம் கலைத்த கோபத்தில்

உள்ளுக்குள் இருந்த பாம்பு சீறி வருகிறது

எல்லாவற்றுக்கும் சேர்த்து வைத்து

இருப்பின் சாத்தியங்களில் நிகழும் அபத்தங்களால்

உயிர்த்திருப்பதன் அதிசயங்கள் எல்லாருக்கும் வாய்ப்பதில்லை என்று

கனவில் வரும் பிசாசுகள் ஆறுதல் சொல்கின்றன

அட்சரம் பிசாகமல் தொடரும்

அலுவல் வாழ்க்கையில் ஈக்கள் மொய்க்கின்றன

மாதக் கடைசியில் வரும் ஊதியத்தை

கட்டெறும்புகள் வாங்கிக் கொண்டு ஓடுகின்றன

கடன்காரர்கள் அடையாளம் தெரியாத கோபத்தோடு

நடுநிசியில் துரத்திக் கொண்டு வருகிறார்கள்

அகப்படாமல் அகதி போல தப்பித்து ஓடி வருகையில்

உள்ளே விடாமல் வீட்டுக்கதவுகள் தானாக மூடிக் கொள்கின்றன

*****