பாத்திர மயக்கம்

பாத்திர மயக்கம்

முதலில் நாயகனாக அழைத்தார்கள்

என்ன நினைத்தார்களோ வில்லனாக்கினார்கள்

அதுவும் ஒத்து வராத போது காமெடியனாக்கிப் பார்த்தார்கள்

இதுவும் ஒத்து வராத போது

குணச்சித்திர வேடத்திற்கு முயன்று பார்த்தார்கள்

கொஞ்சம் தயங்கி எதுவும் ஒத்து வரவில்லை என

நாயகி வேடம் பரவாயில்லையா என்றார்கள்

நடிப்பவருக்கென்ன நாய் வேடத்திற்கும் தயார் என்ற போது

குரைப்பொலி சரியில்லை என்று பூனை வேடம் தந்தார்கள்

கடைசியில் புல்லரித்துப் போனார்கள்

இப்படி ஒரு நடிகரைக் கண்டதில்லை என

உனக்கொரு பயோபிக் எடுக்க வேண்டும் என்று

என் பாத்திரத்தை வேறொருவருக்குத் தந்தார்கள்

அதில் எனக்கொரு துணைப் பாத்திரம் தந்தார்கள்

துணைப்பாத்திரத்தில் நடித்ததற்கு விருதும் தந்தார்கள்

*****