சக்கரங்கள் சுழலும் பாதை

சக்கரங்கள் சுழலும் பாதை

கடக்கும் பாதையெங்கும் அனாதைகளாய்

ஓணான்கள் செத்துக் கிடக்கின்றன

ஆங்காங்கே அணில்களும் அகதிகளாய்

ஆதரிப்பாரின்றி அடிபட்டுக் கிடக்கின்றன

நடுசாலையில் வரையப்பட்ட ஓவியம் போல

பாம்புகள் செத்த சுவடுகளும் கண்ணில் படுகின்றன

விபத்துப் பகுதி என்றெழுதப்பட்ட பலகையை

படிக்காமல் கடந்து கொண்டிருக்கும்

நாய்களோடும் ஆடுகளோடும்

படித்தபடிக் கடக்கும் மனிதர்களும்

அவ்வபோது அடிபட்டுப் போகின்றனர்

எப்போதோ நிகழும் ஒரு துர் மரணம்

சில நாட்கள் வேகத்தை மட்டுப் படுத்தினாலும்

கூடிய விரைவில் வேகம் கொண்டு விடுகின்றன

வேகமாய்ச் சுழல்வதற்கெனப் பிறப்பெடுத்த சக்கரங்கள்

ஒவ்வொரு சக்கரமும் கொன்றழிக்கும்

உயிர்களை நினைத்து தூக்கமிழந்து தவிக்கிறார்

ஆதியில் சக்கரத்தைக் கண்டறிந்தவர்

நீயின்றிப் போனாலும்

வேறொருவர் கண்டுபிடித்துதான் ஆக வேண்டும் என்று

தூக்கமிழந்தவருக்கு நிரந்தர தூக்கம் தர

கழுத்தைக் குறி வைத்து ஆணைச் சக்கரத்தை ஏவுகிறார் கடவுள்

தர்மத்தின் பாதையைக் குருதியில் நனைத்தபடி

சுழன்றபடிப் போகின்றன வழியில் படுபவைகளை

அடிபடாமல் காக்க முடியாத சக்கரங்கள்

*****