சுவர் சூழ் வீடுகள்

சுவர் சூழ் வீடுகள்

வேலிகள் நிறைந்த வீடுகள் தோறும்

சுற்றுச்சுவர்கள் சூழ்ந்திருக்கின்றன

வண்ணத்துப் பூச்சிகளும் சிட்டுக்குருவிகளும் வந்த போதிருந்த

வேலிச்சண்டைகள் இப்போதில்லை என்று

சிலாகித்துக் கொள்கிறார் நாட்டாமைக்காரர்

கற்களும் மணலும் ஜல்லிகளும்

எங்கிருந்தோ வந்து இறங்கிக் கொண்டிருக்கின்றன

சாலைகள் காயம் பட்டு சீழ் பிடித்தது போல

நீர் தேங்கி நிறைமாதமாய் நிற்கின்றன

வேலித் தகராறில் ஓரண்டை இழுத்தவரின்

தலையை வெட்டி விட்டு சிறையிலிருக்கும்

தலையாரி பெயிலில் வந்து போகும் போதெல்லாம்

சுற்றிலும் சுவராய் இருப்பதாய்ச் சொல்லி விட்டுப் போவார்

இங்கு மட்டும் என்னவாம்

சுவர் சூழ்ந்த சிறைக்குள் இருக்கின்றன வீடுகள்

*****