பூட்டைத் துளைத்தெழும் நினைவுச் சாவிகள்

பூட்டைத் துளைத்தெழும் நினைவுச் சாவிகள்

திறந்து கிடக்கும் வீடுகள்

எந்த நினைவையும் எழுப்புதில்லை

பூட்டிக் கிடக்கும் வீடுகள்

உள்ளே யாரோ இருப்பது போன்ற

உணர்வை எழுப்பிக் கொண்டிருக்கின்றன

ஒரு பூட்டு திறக்கப்படாத சாவியின் நினைவைக்

கிளர்ந்தெழச் செய்து விடுகின்றது

பூட்டிய வீட்டிக்குள் யாருமில்லையென்ற நிரூபணம்

வழங்கப்பட்ட பின்னும்

நினைவுக்குள் ஒருவர் பூட்டிய வீட்டினுள்

ஒளிந்திருக்கிறார்

அவரைத் துரத்திப் பிடித்தபடி விளையாடிக் கொண்டிருக்கிறது மனது

பார்ப்பவர்கள் கேட்பவர்கள் ஒரு மாதிரியாய் நினைக்கிறார்கள்

அவர்களுக்கு என்ன

பக்கத்து வீட்டில் யார் இருக்கிறார் என்று அறியாதவர்கள்

பூட்டியிருக்கும் வீட்டினுள் இருக்கும் மனிதரை

நான் பார்த்துக் கொள்கிறேன்

பேசிக் கொள்கிறேன்

பகிர்ந்து கொள்கிறேன்

அவர்களை முதலில் கண்ணில் படும் மனிதர்களிடம்

பேசச் சொல்லுங்கள்

எதையாவது பகிர்ந்து கொள்ளச் சொல்லுங்கள்

*****