காற்றில் கலந்த கைக்குட்டை

காற்றில் கலந்த கைக்குட்டை

கைகளுக்கு அகப்படாத கைக்குட்டை

காற்றின் கைகளில் அலைந்தோடுகிறது

காற்றில்லா நேரங்களில்

நெற்றியில் வழிந்த வியர்வையை

உறிஞ்சியெடுத்தது அதன் மென்ஸ்பரிசங்கள்

காற்று வந்து வியர்வை துடைத்த பொழுதில்

காற்றின் குழந்தையாகிப் பறந்து செல்கிறது

ஒருவேளை காற்றுக்கு வியர்க்கலாம்

வியர்க்கும் காற்றுக்கு கைக்குட்டை

வியர்வையைத் துடைத்து விடலாம்

காற்று கவர்ந்து சென்றது போன்ற கைக்குட்டையைப்

பின்னாட்களில் கடை கடையாகத் தேடிப் பார்த்தேன்

ஓர் அபூர்வமான கைக்குட்டையைத்தான்

காற்று கவர்ந்து சென்றிருக்கிறது

அன்றிலிருந்து எத்தனையோ கைக்குட்டைகளைக்

காற்றில் தவற விட்டுப் பார்க்கிறேன்

தவற விட்ட பொருட்களை அலையில்

கொண்டு வந்து சேர்க்கும் கடலைப் போல

காற்று கைகளில் கொண்டு வந்து சேர்த்துக் கொண்டிருந்தது

காற்றுக்குப் பிடித்தது போன்றதோரு கைக்குட்டையை

என்னால் கடைகளில் வாங்க முடியவில்லை

*****